Ayush Charag
ibaraten chamak rahi hain dil men tere pyaar ki
diye ki lau men jal rahi hai raat intizar ki
bhaTak rahi hai asman men aarzu ki faḳhta
zamin pe zindagi paḌi hai aag men buḳhar ki
miri vo manzilen na thiin jo manzilen mujhe milin
miri nahin thi raah vo jo main ne iḳhtiyar ki
jhulas ga.e nigah ke tamam ḳhvab aanch se
ye dastan hai nazar pe raushni ke vaar ki
sula rahi hai beach raah men thakan hamen ‘charagh’
jaga rahi hai justuju magar tire dayar ki
Leave a Reply