Rahi Fidai
ḳhud ko mumtaz banane ki dili-ḳhvahish men
dushman-e-jan se mili meri ana sazish men
ruuh raushan na hui aur na dil hi bahla
vaqt barbad kiya jism ki ara.ish men
aaj makus hai a.ina-e-ayyam-e-jahan
niim men rang-e-hina zor-e-tapish barish men
ḳhud ko minnat-kash-e-qismat na karo dida-varo
gulshan-e-shauq ugana hai tumhen atish men
dast-basta hai sahar shab ki ijazat ke liye
ab ke ḳhuddar tabi.at na rahi tabish men
pasti-e-fikr-o-nazar vahshat-e-asrar-o-rumuz
ho raha hai ba-ḳhuda jahl fuzun danish men
qabza-e-vaqt men jugnu hai sitara ki sharar
ham faqiron ka bhala hoga na ala.ish men
bandh le apni girah men ye nasihat ‘rahi’
zabt se kaam le naḳhun na baḌha ḳharish men
Leave a Reply