jis men ik husn-e-tavazun ho vo nudrat di jaa.e
kya qabahat hai agar fikr ko vus.at di jaa.e
mashvare qabil-e-taslim tire hain ki nahin
ghaur karne ke liye kuchh mujhe mohlat di jaa.e
maslahat jhuuT pe insan ko maa.il kar de
is qadar saḳht na ta’zir-e-sadaqat di jaa.e
is amal se dil-e-fankar pe kya guzregi
le ke mahtab agar sham.a ki qimat di jaa.e
saḳht mushkil hai ghalat baat pe qaa.il karna
ek do hon to unhen fahm-o-basirat di jaa.e
baat to jab hai ki mamnun-e-baharan hon sabhi
phuul to phuul hain kanTon ko bhi nuz.hat di jaa.e
chara-e-gham ke liye shart hai iḳhlas ‘nasir’
kaun hai shahr men aisa jise zahmat di jaa.e
Leave a Reply