tum na aaoge to kya ho ja.ega
dard ḳhud baḌh kar dava ho ja.ega
jo ḳhudi se ashna ho ja.ega
mahram-e-raz-e-baqa ho ja.ega
kya pilaoge kisi suqrat ko
zahar to ab-e-baqa ho ja.ega
ham karenge jab nava-e-haq buland
ik zamana ham-nava ho ja.ega
parsa.i dekhti rah ja.egi
bab-e-rahmat ham pe va ho ja.ega
shauq-e-manzil shart hai ai rah-rau
zarra zarra rahnuma ho ja.ega
bargah-e-husn par kar do nisar
zindagi ka haq ada ho ja.ega
naaz kya hai zindagi ke saaz par
ek din ye be-sada ho ja.ega
ham ne puuja tha kisi ko pyaar se
kya ḳhabar thi vo ḳhuda ho ja.ega
iffat-e-qalb-o-nazar paida to kar
husn majbur-e-vafa ho ja.ega
kaam le ‘sabir’ tu sabr-o-shukr se
us ki jo hogi raza ho ja.ega
Leave a Reply