Kabhi Be-Muddaa Dena Kabhi Ba-Muddaa Dena

Hayat Madrasi

kabhi be-mudda.a dena kabhi ba-mudda.a dena

samajh men kuchh nahin aata tiri sarkar ka dena

kabhi mehrab-e-dil ko darḳhur-e-ka.aba bana dena

kabhi daman-e-gham ko bhi madine ki hava dena

mubarak un ko apni raah men kanTe bichha dena

hamen aata hai bas dushman ke haq men bhi dua dena

janab-e-shaiḳh ka ye zohd-o-taqva kya ibadat hai

ma.al-e-bandagi hai zindagi apni miTa dena

tiri nazron ke sadqe be-piye hi mast hain saaqi

hamare samne se saghar-o-mina haTa dena

riyaz-e-zaḳhm ko di tazgi meri nigahon ne

mire ashkon ko aata hai ḳhizan men gul khila dena

ghazal ko ab ‘hayat’-afroz nazzaron ki hajat hai

qadamat se alag haT kar na.i duniya basa dena