Sans Ki Aas Nigahban Hai KHabar-Dar Raho

saañs kī aas nigahbāñ hai ḳhabar-dār raho

dil charāġh-e-tah-e-dāmāñ hai ḳhabar-dār raho

phir do aalam ke ujaḌne kī ghaḌī aa pahuñchī

aaj phir husn pashemāñ hai ḳhabar-dār raho

jāda-e-shahr-e-tasavvur ki rahā rishta-e-jāñ

sūrat-e-gard-e-pareshāñ hai ḳhabar-dār raho

phir kisī dil meñ qayāmat ne sukūñ DhūñDh liyā

aaj phir vā dar-e-zindāñ hai ḳhabar-dār raho

rañg-o-ḳhushbū ke tilismāt meñ khone vaalo

phuul meñ aag bhī pinhāñ hai ḳhabar-dār raho

is qadar mahv na ho jaao ġham-e-duniyā meñ

saaf aks-e-ġham-e-jānāñ hai ḳhabar-dār raho

dil lagāo na chaman se na chaman vāloñ se

āḳhir-e-kār bayābāñ hai ḳhabar-dār raho

do ghaḌī ke liye mumkin hai koī phuul khile

hāsil-e-dasht-e-muġhīlāñ hai ḳhabar-dār raho

‘bū-alī’ ābla-pā sar-ba-garebāñ hai yahāñ

maut is dard kā darmāñ hai ḳhabar-dār raho

dil ki hai mātamī-e-hasrat-e-ta.amīr-e-azal

ḳhud hī ġhārat-e-gar-e-sāmāñ hai ḳhabar-dār raho

phir rag-o-pai meñ utar ā.eñge sūraj gal kar

aaj phir koī ġhazal-ḳhvāñ hai ḳhabar-dār raho

ek ik harf ki aa.egā zabāñ par logo

girah-e-sho.ala-e-pechāñ hai ḳhabar-dār raho

kab talak so.oge ai kūcha-e-jānāñ vaalo

asar-e-jaur numāyāñ hai ḳhabar-dār raho

zikr merā ba-badī bhī na zabāñ par laao

ye bhī ik sūrat-e-darmāñ hai ḳhabar-dār raho

tūr-e-sīnā ho ki lahore kī galiyāñ ‘shohrat’

husn-e-har-rañg gurezāñ hai ḳhabar-dār raho

Leave a Comment