Shohrat Bukhari
saans ki aas nigahban hai ḳhabar-dar raho
dil charagh-e-tah-e-daman hai ḳhabar-dar raho
phir do aalam ke ujaḌne ki ghaḌi aa pahunchi
aaj phir husn pasheman hai ḳhabar-dar raho
jada-e-shahr-e-tasavvur ki raha rishta-e-jan
surat-e-gard-e-pareshan hai ḳhabar-dar raho
phir kisi dil men qayamat ne sukun DhunDh liya
aaj phir va dar-e-zindan hai ḳhabar-dar raho
rang-o-ḳhushbu ke tilismat men khone vaalo
phuul men aag bhi pinhan hai ḳhabar-dar raho
is qadar mahv na ho jaao gham-e-duniya men
saaf aks-e-gham-e-janan hai ḳhabar-dar raho
dil lagao na chaman se na chaman valon se
aḳhir-e-kar bayaban hai ḳhabar-dar raho
do ghaḌi ke liye mumkin hai koi phuul khile
hasil-e-dasht-e-mughilan hai ḳhabar-dar raho
‘bu-ali’ abla-pa sar-ba-gareban hai yahan
maut is dard ka darman hai ḳhabar-dar raho
dil ki hai matami-e-hasrat-e-ta.amir-e-azal
ḳhud hi gharat-e-gar-e-saman hai ḳhabar-dar raho
phir rag-o-pai men utar a.enge suraj gal kar
aaj phir koi ghazal-ḳhvan hai ḳhabar-dar raho
ek ik harf ki aa.ega zaban par logo
girah-e-sho.ala-e-pechan hai ḳhabar-dar raho
kab talak so.oge ai kucha-e-janan vaalo
asar-e-jaur numayan hai ḳhabar-dar raho
zikr mera ba-badi bhi na zaban par laao
ye bhi ik surat-e-darman hai ḳhabar-dar raho
tur-e-sina ho ki lahore ki galiyan ‘shohrat’
husn-e-har-rang gurezan hai ḳhabar-dar raho
Leave a Reply