muḳhtalif tariqon se ranj umr bhar paaya
zindagi to kya paa.i ham ne dard-e-sar paaya
dost se tavaqqo thi kuchh karam-numa.i ki
main tavil shikve ko muḳhtasar na kar paaya
vaqi.a sahi lekin jurm hai ye kahna bhi
main ne apne aalam se un ko be-ḳhabar paaya
bul-havas men aur mujh men farq kuchh batao to
kis ko durbin paaya kis ko kam-nazar paaya
is jahan-e-rangin se mutma.in nahin koi
main ne ahl-e-duniya ko azim-e-safar paaya
dil men un ki aamad se nuur ki kiran phuTi
raat ke andhere ne jalva-e-sahar paaya
kaash abhi hayat apni aur kuchh vafa karti
main tire taghaful ka shukr ada na kar paaya
ham ne kya taraqqi ki kasb-e-ilm-o-fan kar ke
bavajud-e-koshish bhi ḳhud ko be-hunar paaya
ab to hadse dil ke yaad bhi nahin ‘nudrat’
kis maqam par khoya kis maqam par paaya
Leave a Reply