Jigar Moradabadi
dil ko mita ke dagh-e-tamanna diya mujhe
ai ishq teri khair ho ye kya diya mujhe
mahshar men baat bhi na zaban se nikal saki
kya jhuk ke us nigah ne samjha diya mujhe
main aur arzu-e-visal-e-pari-rukhan
is ishq-e-sada-lauh ne bahka diya mujhe
har baar yaas hijr men dil ki hui sharik
har martaba umiid ne dhoka diya mujhe
allah re tegh-e-ishq ki barham-mazahiyan
mere hi khun-e-shauq men nahla diya mujhe
khush huun ki husn-e-yar ne khud apne haath se
ik dil-fareb dagh-e-tamanna diya mujhe
duniya se kho chuka hai mira josh-e-intizar
avaz-e-pa-e-yar ne chaunka diya mujhe
daava kiya tha zabt-e-mohabbat ka ai ‘jigar’
zalim ne baat baat pe tadpa diya mujhe
Leave a Reply