Qabil Ajmeri
alam-e-soz-e-tamanna be-karan karte chalo
zarre zarre ko sharik-e-karvan karte chalo
kitne raushan hain vo aariz kitne shirin hain vo lab
rasta kaT ja.ega zikr-e-butan karte chalo
sham-e-gham ki zulmaten hain aur sahra-e-hayat
dida-e-bedar ko anjum-fishan karte chalo
raste men bujh na jaa.en arzuon ke charagh
zikr-e-manzil karvan-dar-karvan karte chalo
jaane kis aalam men aa.en aane vaale qafile
saya-e-divar-e-janan javedan karte chalo
mazhar-e-tahzib hai ik ek tar-e-pairahan
bas yunhi andaza-e-sud-o-ziyan karte chalo
Leave a Reply