hasrat-mohani

Kya Tumko Ilaj-E-Dil-E-Shaida Nahin Aata

kya tum ko ilaj-e-dil-e-shaida nahin aata

aata hai par is tarah ki goya nahin aata

ho jaati thi taskin so ab fart-e-alam se

is baat ko rote hain ki rona nahin aata

tum ho ki tumhen vada-vafai ki nahin khu

main huun ki mujhe tum se taqaza nahin aata

hai paas ye kis ki nigah-e-mahv-e-haya ka

lab tak jo mire harf-e-tamanna nahin aata

un ki nigah-e-mast ke jalve hain nazar men

bhule se bhi zikr-e-mai-o-mina nahin aata

shokhi se vo mana-e-sitam puchh rahe hain

ab lafz-e-jafa bhi unhen goya nahin aata

main dard ki lazzat se raza-mand huun ‘hasrat’

mujh ko sitam-e-yar ka shikva nahin aata

More Poems

Leave a Comment