Urooj Qadri
bani hui hain mire dil ki tarjuman ankhen
suna rahi hain mohabbat ki dastan ankhen
na thi zaban ko ijazat ki hal-e-dil kahti
zaban-e-ashk se karti rahin bayan ankhen
kabhi chhupi hai mohabbat ki main chhupa leta
zaban jo band hui ban ga.iin zaban ankhen
banao daman-e-sada pe in se gul-buTe
qubul ho to karun nazr ḳhun-fishan ankhen
main andalib huun phulon ki diid meri hayat
paron ko bandh na kar band baghban ankhen
sharafat-e-nigah-e-pak ka hai nigaran dil
taharat-e-dil-e-momin ki pasban ankhen
‘uruj’ baḌh ke karo pesh dil ka nazrana
tumhin ko taak rahi hain vo dil-sitan ankhen
Leave a Reply