ab kisi ko kya bata.en kis qadar nadan the
ham vahin kashti ko le aa.e jahan tufan the
kuchh taḌapti arzuen chand be-ma.ani saval
karvan men sab ke sar par bas yahi saman the
ham ne is duniya ke mai-ḳhane men ye dekha fareb
bas vahi pyase rahe jo sahib-e-iman the
zalzalon par aa gaya ilzam achchha hi hua
varna is taḳhrib ke pahle se bhi imkan the
un ghamon ne dil men sadiyon ke vasile kar liye
jo faqat do-char din ke vaste mehman the
bas yahi sach hai ki ham ab un ki mahkumi men hain
jo ‘nafas’ apni haveli men kabhi darban the
Leave a Reply