saval shukr-o-shikayat ka ab raha hi nahin
vo kaj-shi.ar miri samt dekhta hi nahin
kisi men hausla-e-tark-e-mudda.a hi nahin
ye vo mahaz hai jis par koi DaTa hi nahin
thama jo ḳhair se tufan to hai bhanvar aage
mire ḳhilaf samundar bhi hai hava hi nahin
vo jis ka ḳhauf gunahon se rok deta hai
hamare daur men aisi koi saza hi nahin
jahan se pech-o-ḳham-e-rah ka hua aghaz
palaT ke ham ne jo dekha to rahnuma hi nahin
jabin-e-shauq bata ab kahan karun sajda
mujhe talash thi jis ki vo naqsh-e-pa hi nahin
faza hai dang sama.at ke us taghayyur par
koi sada-e-mohabbat se ashna hi nahin
‘nasir’ ja ke tiri anjuman se lauT aaya
gaya tha jis ke irade se vo kaha hi nahin
Leave a Reply