lutf hi lutf hai jo kuchh hai inayat ke siva
hai mohabbat se siva jo hai mohabbat ke siva
doston ke karam-e-ḳhas se bachne ke liye
koi gosha na mila gosha-e-uzlat ke siva
mujh se shikva bhi jo karte hain to ye kahte hain
kuchh bhi aata nahin kya tujh ko shikayat ke siva
aap ke ḳhat ko main kis baat ka ḳhummar kahun
is men sab kuchh hai bas ik harf-e-mohabbat ke siva
jis qadar chahun gunahon pe hansun ḳhuub hansun
ye ilaaj aur bhi hai ashk-e-nadamat ke siva
shaiḳh hi hoga jo milte nahin do-char ayagh
kaun aa sakta hai maiḳhane men hazrat ke siva
vo jo kahte hain ki hai fahm-o-farasat ham se
aise logon men sabhi kuchh hai farasat ke siva
nahin ma.alum ki kyuun ruuh isi se ḳhush hai
ranj to aur bhi hain ranj-e-mohabbat ke siva
rah ga.e rah-e-amanat men mala.ek thak kar
marhala tai na hua ye miri himmat ke siva
tum ko ma.alum ho ai shaiḳh-o-barahman to kaho
aur bhi koi ibadat hai mohabbat ke siva
is na.i baat ko bhi ‘arsh’ kabhi socha hai
aj-kal sher men jiddat hai to jiddat ke siva
Leave a Reply