Ameer Raza Mazhari
soz-e-dil sham-e-tapan ho jaise
aag chulhe men nihan ho jaise
kaisi afsurda bahar aa.i hai
ab bhi gulshan men ḳhizan ho jaise
mujh pe mahfil men tabassum ki nazar
ba-tufail-e-digran ho jaise
aap ki chashm-e-inayat ka yaqin
dil-fareb ek guman ho jaise
yuun vo sunte hain kahani meri
ik hadis-e-digran ho jaise
chaunk uThe ham to qayamat hogi
zindagi ḳhvab-e-giran ho jaise
dil se ik aah to nikli thi magar
sham-e-kushta ka dhuan ho jaise
samne un ke ye aalam hai ‘raza’
ek aalam nigaran ho jaise
Leave a Reply