vaqt karta hai ḳhud-kushi mujh men
lamha lamha hai zindagi mujh men
sone vaali sama.ato jaago
ḳhamushi bolne lagi mujh men
shukriya ai jalane vaale tera
duur tak ab hai raushni mujh men
roz apna hi ḳhuun piita huun
aisi kab thi darindagi mujh men
is na.e daur men na kho jaa.e
ye jo baaqi hai sadgi mujh men
sher mera tha daad us ko mili
shaḳhsiyat ki kami jo thi mujh men
janta huun main apne qatil ko
roz karta hai ḳhud-kushi mujh men
sher kahna nahin hai sahal ‘faraz’
ye vadi.at hai qudrati mujh men
Leave a Reply