dekh kar vahshat nigahon ki zaban bechain hai
phir sulagne ko koi ik dastan bechain hai
kaali raton ke saliqe din ko kyuun bhane lage
soch kar gum-sum hai dharti asman bechain hai
kaghazon par ho ga.e saare ḳhulase hi magar
kuchh to hai jo hashiyon ke darmiyan bechain hai
jab se sazish men samundar ki hava shamil hui
kashti hai chup-chap si aur badban bechain hai
bhed jab sargoshiyon ka khul ke aaya samne
shor vo uTTha hai apna hukmaran bechain hai
hijr ke mausam ki kuchh mat puchhiye uf dastan
main yahan betab huun to vo vahan bechain hai
Leave a Reply