Jis Ne Shiraaza Bikhera Umr Ka

jis ne shīrāza bikherā umr kā

ye junūñ hāsil hai merā umr kā

ek lamha kyā milā thā hijr ko

kar liyā us ne baserā umr kā

thā diyā lekin use bujhne diyā

chun liyā maiñ ne añdherā umr kā

ek din aa.egā jab āfāq meñ

Duub jā.egā saverā umr kā

kū-ba-kū haiñ hijr kī parchhā.iyāñ

is se hai ābād Derā umr kā

jāntī huuñ chand lamhe saath hai

ho nahīñ saktā vo merā umr kā

‘roz’ tere hijr meñ masrūr hai

hai yahī ehsān terā umr kā

Leave a Comment