jis ne shiraza bikhera umr ka
ye junun hasil hai mera umr ka
ek lamha kya mila tha hijr ko
kar liya us ne basera umr ka
tha diya lekin use bujhne diya
chun liya main ne andhera umr ka
ek din aa.ega jab afaq men
Duub ja.ega savera umr ka
ku-ba-ku hain hijr ki parchha.iyan
is se hai abad Dera umr ka
janti huun chand lamhe saath hai
ho nahin sakta vo mera umr ka
‘roz’ tere hijr men masrur hai
hai yahi ehsan tera umr ka
Leave a Reply