ik ḳhalish si hai mujhe taqdir se
al-aman us ḳhar-e-daman-gir se
hasrat-e-nazzara ki tasir se
parda uTTha yaar ki tasvir se
sham-e-gham ke rone vaale sabr kar
sub.h bhi hogi tiri taqdir se
idda.a-e-zabt-e-gham karna paḌa
tang aa kar ah-e-be-tasir se
mujh ko divana samajh len ahl-e-hosh
kyuun ulajhte hain miri zanjir se
dil nahin ik aabla siine men hai
is nigah-e-garm ki tasir se
hoti hai taskin ‘farhat’ kuchh na kuchh
ḳhush huun apni ah-e-be-tasir se
Leave a Reply