Poet
miri udasi mire darmiyan band karo
koi saliqe se ye itr-dan band karo
paḌha raha huun main bachchon ko karbala ka nisab
tum apni tishna-labi ka bakhan band karo
zara samajhne ki koshish karo mire ashko
vo aaj ḳhush hai tum apni zaban band karo
main ek shart pe raazi huun qaid hone ko
isi qafas men mira asman band karo
mujhe akele men karni hain ḳhud se kuchh baten
ye mera hukm hai divaro kaan band karo
ghazal men laane se gham aur baḌh gaya hai ‘charagh’
shuter girao suḳhan ki dukan band karo
Leave a Reply