Mubarak Mungeri
ishq ki bargah tak pahuncha
husn ja-e-panah tak pahuncha
dil ke hathon vo shoḳh bhi aḳhir
mere hal-e-tabah tak pahuncha
ab to utra huun tark-e-ulfat par
dard fikr-o-nigah tak pahuncha
asiyon se hai mujtanib vaa.iz
zohd hadd-e-gunah tak pahuncha
tesha-e-koh-kan ka vaar aḳhir
satvat-e-kaj-kulah tak pahuncha
jab bhi taḳhrib-e-din ki baat chali
silsila ḳhanqah tak pahuncha
DhunD kar hashr men karam us ka
mere fard-e-siyah tak pahuncha
Leave a Reply