Khursheed Akbar
guzar ga.i hai mujhe reg-zar karti hui
vo ek machhli samundar shikar karti hui
na jaane kitne bhanvar ko rula ke aa.e hai
ye meri kashti-e-jan ḳhud ko paar karti hui
vo ek sa.at-e-ma.asum dil ki parvarda
mukar ga.i hai magar e’tibar karti hui
junun ki aḳhiri larzida muzmahil si raat
jhapak ga.i hai zara intizar karti hui
ye kaisi ḳhvahish-e-na-did hai dorahe par
sahm ga.i hai abhi mujh pe vaar karti hui
lipaT ke so ga.i aḳhir sham-e-firaq ke saath
shab-e-siyah sitare shumar karti hui
safar men kaisi hararat qarib thi ‘ḳhurshid’
utar ga.i hai mujhe dhar-dar karti hui
Leave a Reply