Tasneem Abidi
tamam umr-e-ravan ka ma.aal hairat hai
javab jis ka nahin vo saval hairat hai
dukan-e-chashm yahan be-misal hairat hai
is aa.ine ka sarasar kamal hairat hai
ye zindagi to tire saath saath ḳhatm hui
jo mujh men baaqi hai vo la-zaval hairat hai
vo ḳhvab aise the ta.abir un ki thi hi nahin
ramida hijr-e-gurezan visal hairat hai
hui tilism-zada jab ye aa.ine ne kaha
yahan to saare ka saara jamal hairat hai
adam vajud-e-adam uf ye silsile kaise
main luT ga.i huun magar mala-mal hairat hai
ye ka.enat hai hairan apne hone par
qadam qadam pe yahan mahv-e-hal hairat hai
Leave a Reply