Tamam Umr-E-Rawan Ka Maal Hairat Hai

tamām umr-e-ravāñ kā ma.aal hairat hai

javāb jis kā nahīñ vo savāl hairat hai

dukān-e-chashm yahāñ be-misāl hairat hai

is aa.ine kā sarāsar kamāl hairat hai

ye zindagī to tire saath saath ḳhatm huī

jo mujh meñ baaqī hai vo lā-zavāl hairat hai

vo ḳhvāb aise the ta.abīr un kī thī hī nahīñ

ramīda hijr-e-gurezāñ visāl hairat hai

huī tilism-zada jab ye aa.ine ne kahā

yahāñ to saare kā saarā jamāl hairat hai

adam vajūd-e-adam uf ye silsile kaise

maiñ luT ga.ī huuñ magar mālā-māl hairat hai

ye kā.enāt hai hairān apne hone par

qadam qadam pe yahāñ mahv-e-hāl hairat hai

Leave a Comment