dilon par ye naqsh us ne apna biThaya
ki jo choT par said aaya biThaya
misal-e-kabutar mire dil ko us ne
bhagaya bulaya uThaya biThaya
tire atishin husn ne sham.a ko shab
khapaya jalaya galaya biThaya
uThaya usi gham ne duniya se pyare
kabhi tum ne ham ko na tanha biThaya
samajh teri ulTi hai ai jan-e-alam
ki apna uThaya paraya biThaya
na bole lahad men bhi ham Dar se tere
farishton ne kitna jagaya biThaya
gaya koThe par vo ye ki mah ne azmat
ki ujla bichhauna bichhaya biThaya
ye vo qais hai ḳhaas shagird mera
pakaḌ kaan jis ko uThaya biThaya
‘vaqar’ is ghazal ki zamin had buri thi
bahut zor de kar biThaya biThaya
Leave a Reply