Hum Apna Aap Lutane Kahan Pe Aa Gae Hain

ham apna aap lutane kahan pe aa gae hain

khud apni qadren ganvane kahan pe aa gae hain

dilon se dil mile rahte the ghurbaton men miyan

shikam ki aag bujhane kahan pe aa gae hain

likha tha purkhon ne sadiyon men jin ko mehnat se

vo saare shajre jalane kahan pe aa gae hain

jo chahte the rahe apni zaat tak har baat

vo apne zakhm dikhane kahan pe aa gae hain

zamin pe apni hi jal bujh ke khaak ho jaate

ham apne dil ko jalane kahan pe aa gae hain

ye vo jagah hai jahan jism tak nahin chhupte

ham apne sar ko chhupane kahan pe aa gae hain

kisi bhi rishte ki izzat yahan nahin baaqi

miyan ye aaj zamane kahan pe aa gae hain

ye sach hai ahd-e-taraqqi kiya tha khud se ‘adil’

magar ye ahd nibhane kahan pe aa gae hain

Leave a Comment