Sanjay Mishra Shauq
chehre pe mere ab vo ra.unat nahin rahi
a.ina dekhne ki zarurat nahin rahi
qaabu men phir hamari ibadat nahin rahi
virse men jo mili thi imarat nahin rahi
sad shukr apne paanv pe chalne laga huun main
baisakhiyon ki mujh ko zarurat nahin rahi
jivan hai jaise dhuup men dimak-zada kitab
jis ke varaq ulaTne ki himmat nahin rahi
ilm-o-hunar sadaqat-o-mehr-o-vafa ḳhulus
bazar men kisi ki bhi qimat nahin rahi
sota huun ankhen muund ke bhigi zamin par
achchha hai mere sar pe koi chhat nahin rahi
kasa-ba-dast ghuum rahi hain sharafaten
ab un ko munh chhupane ki hajat nahin rahi
sach bolna tapak se milna har ek se
jazbe ye vo hain jin men hararat nahin rahi
kaa.i ki ik chaTan pe Thahra hua huun main
pairon ko ab phisalne ki aadat nahin rahi
Leave a Reply