ḳhvab sahra tiri ta.abir nikal aa.i hai
koi vahshat hai ki jagir nikal aa.i hai
shaḳh-e-mizhgan ke parinde hain ye aansu goya
ab-o-dana liye taqdir nikal aa.i hai
ḳhuun ubalta hai nikalta hai dhuan ankhon se
dekh paani ki ye tahrir nikal aa.i hai
shahr is tarah bayaban men gira hai jaise
vaqt ke paanv se zanjir nikal aa.i hai
zindagi tujh ko magar sharm nahin aati kya
kaisi kaisi tiri tasvir nikal aa.i hai
raat hai jism hai bistar hai falak pahlu men
chand nikla hai ki shamshir nikal aa.i hai
tez lahron men salamat nahin koi ‘ḳhurshid’
kis tarah hasrat-e-tamir nikal aa.i hai
Leave a Reply