mo.ajaze ka dar khula aur ik asa raushan hua
duur gahre paniyon men rasta raushan hua
jaane kitne surajon ka faiz hasil hai use
is mukammal raushni se jo mila raushan hua
aankh valon ne chura li raushni saari to phir
ek andhe ki hatheli par diya raushan hua
ek vahshat da.era-dar-da.era phirti rahi
ek sahra silsila-dar-silsila raushan hua
mustaqil ik be-yaqini, ik musalsal intizar
phir achanak ek chehra ja-ba-ja raushan hua
aaj phir jalne lage biite hue kuchh ḳhaas pal
aaj phir ik yaad ka atish-kada raushan hua
jaane kis aalam men likkhi ye ghazal tum ne ‘nabil’
ḳhamushi bujhne lagi, shahr-e-sada raushan hua
Leave a Reply