Poet
ek aalam ne jubba-sa.i ki
ai buto tum ne bhi ḳhuda.i ki
ashiqon ke lahu ki pyasi hain
machhliyan us kaf-e-hina.i ki
zulf-e-pur-pech se jo dil uljha
biich men raḳh paḌa safa.i ki
murgh-e-be-bal-o-par huun ai sayyad
aarzu hai kisi riha.i ki
ai junun dasht ko chalenge ham
hai qasam is barahna-pa.i ki
sar juda ham ne apna kar Daala
aa.i jab guftugu juda.i ki
phir gaya yaar ghar ke paas aa kar
baḳht-e-bargashta ne bura.i ki
saikḌon jaame tujh pe phaTte hain
dhuum hai teri mirza.i ki
tujh se to ham ko ai ḳham-e-abru
thi na ummid kaj-ada.i ki
koi qatil ki raah bhula tha
ai ajal tu ne rahnuma.i ki
dil kahin aur ham ne aTkaya
be-vafaon se bevafa.i ki
na ga.i zahidon ke paas kabhi
duḳhtar-e-raz ne parsa.i ki
shahr men ja.egi miri pa-posh
qadr vaan kya barahna-pa.i ki
saaf hai aa.ina tan-e-pur-nur
hai dalil us pe ḳhud-numa.i ki
kasa-e-mah kyuun na ho pur-nur
barson us kuche ki gada.i ki
ka.aba-e-dil men bhi maqam kiya
ai buto tum ne kya rasa.i ki
ḳhat ke aane pe bhi mukaddar hai
surat ab kaun si safa.i ki
bal-o-par bhi ga.e bahar ke saath
ab to surat nahin riha.i ki
kis ke kuche ki raah bhula huun
ḳhizr ne bhi na rahnuma.i ki
shaah kahla.e har tarah se ‘vazir’
badshahi na ki gada.i ki
Leave a Reply