ham tirgi men sham.a jala.e hue to hain
hathon men surḳh jaam uTha.e hue to hain
us jan-e-anjuman ke liye be-qarar dil
ankhon men intizar saja.e hue to hain
milad ho ki majlis-e-gham mubtala tire
angan men dal ke farsh bichha.e hue to hain
hizb-e-haram ne shauq-e-junun ko baḌha diya
siine se ham buton ko laga.e hue to hain
duniya kahan thi pas-e-virasat ke zimn men
ik diin tha so us pe luTa.e hue to hain
kab chobdar par hon sar-afraz dekhiye
us shoḳh ki nigah men aa.e hue to hain
Leave a Reply