bhaḌka.en miri pyaas ko aksar tiri ankhen
sahra mira chehra hai samundar tiri ankhen
phir kaun bhala dad-e-tabassum unhen dega
ro.engi bahut mujh se bichhaḌ kar tiri ankhen
ḳhali jo hui sham-e-ghariban ki hatheli
kya kya na luTati rahin gauhar teri ankhen
bojhal nazar aati hain ba-zahir mujhe lekin
khulti hain bahut dil men utar kar tiri ankhen
ab tak miri yadon se miTa.e nahin miTta
bhigi hui ik shaam ka manzar tiri ankhen
mumkin ho to ik taaza ghazal aur bhi kah luun
phir oḌh na len ḳhvab ki chadar tiri ankhen
main sang-sifat ek hi raste men khaḌa huun
shayad mujhe dekhengi palaT kar tiri ankhen
yuun dekhte rahna use achchha nahin ‘mohsin’
vo kanch ka paikar hai to patthar tiri ankhen
Leave a Reply