Poet
jahan men hai har ik ik na ik ada ke liye
koi vafa ke liye hai koi jafa ke liye
hai ek ghunT bahut shaiḳh-e-parsa ke liye
gilas bhar ke na do mai-kasho ḳhuda ke liye
hamare dard ko be-dard dard jaane kya
ye dard vo hai ki hai dard-ashna ke liye
kahin tumhin ko tumhari nazar na ho jaa.e
na dekho aa.ina ai jan-e-man ḳhuda ke liye
falak ko toḌ ke arsh-e-barin hila dena
hai sahl kaam mire nala-e-rasa ke liye
zahe-nasib ki apne vafa-shi.aron men
mujhi ko chun liya us shoḳh ne jafa ke liye
hadaf bana.ega dil ko mire jigar ko bhi
tiri nigah ka paikan nahin ḳhata ke liye
falak se hoti hain nazil bala.en ban ban kar
kabhi jo haath uThata huun main ḳhuda ke liye
jahan men koi is se juda nahin ai dil
ḳhata bashar ke liye hai bashar ḳhata ke liye
agar hai sar tire ḳhanjar ke vaste ai tark
to hai jigar bhi mira navak-e-ada ke liye
mila usi ko maza zindagi ka ai ‘sabir’
jo mar-miTa hai kisi shoḳh-e-parsa ke liye
Leave a Reply