mujh se kyuun kahte ho mazmun ghair ki tahrir ka
janta huun muddaa main aap ki taqrir ka
saath gar sone na doge tum ko bhi niind aa chuki
main to aadi ho gaya huun nala-e-shab-gir ka
apne matlab ki samajh kar ho gae the ham to ḳhush
kyuun mukarte ho yahi matlab hai us taqrir ka
ahd kis kaa, aap jo kahte use sach janta
kya karun qaail huun main to ghair ki tadbir ka
kuchh asar un par hua to kya hi dete hain fareb
kahte hain qaail nahin main ah-e-be-tasir ka
ye to farmao ki kya us ko karunga main muaaf
mere aage zikr kyuun hai ghair ki taqsir ka
ek din sun kar chale aae the vo be-saḳhta
asman par hai dimagh ab ah-e-be-tasir ka
panja-e-ulfat se pakda hai use dil ne mire
sahl hai qatil koi pahlu se khinchna tiir ka
koshish-e-beja thi ye kuchh e’timad-e-aql par
ab ye darja hai ki qaail hi nahin tadbir ka
jitne sar hain utne saude kya ḳhata naseh miri
main hi ik qaidi nahin us zulf-e-alam-gir ka
kya kaha tha main ne tum kya samjhe is ka kya ilaaj
tum hi munsif ho ye matlab tha miri taqrir ka
ye mira likkha ki jo tadbir ki ulti padi
aur is par bhi mujhe shikva nahin taqdir ka
jazb-e-ulfat is ko kahte hain kahin pad jaae haath
zaḳhm dil par hi pahunchta hai tiri shamshir ka
mujh ko us ke paas jaana us men jo kuchh ho ‘nizam’
ek matlab janta huun zillat o tauqir ka