Apni Mohabbaton Ka Ye Achchha Sila Mila

Qadir Siddiqi

apni mohabbaton ka ye achchha sila mila

jo bhi mila mujhe vo mujhi se ḳhafa mila

tujh se bichhaḌ ke bhi main na tujh se bichhaḌ saka

jis raah par gaya main tira naqsh-e-pa mila

ahl-e-karam ki bhiiḌ se guzri hai zindagi

tujh sa magar koi na karam-ashna mila

duniya jafa-shi.ar rahi hai ye sach sahi

ai rah-navard rah-e-vafa tujh ko kya mila

is ko quyud-e-aql ne divana kar diya

bahar mila mujhe to vo achchha-bhala mila

ḳhushiyan milin to aankh jhapakne ki der tak

gham jo mila mujhe vo bahut der-pa mila

is muḳhtasar hayat men kis kis ko roiye

har marhala hayat ka sabr-azma mila

nadida ik kashish hai nahin jis ka koi naam

dil se nigah tak ik ajab silsila mila

be-e’tina.iyon se mili tab-e-zabt-e-gham

teri navazishon se mujhe hausla mila

tera karam hai teri inayat hai ai junun

main jis ko DhunDhta tha mujhi men chhupa mila

‘qadir’ bahut nihal hai apni shikast par

baazi laga.i dil ki to us ka maza mila