aaya hai mujh ko ek but-e-sim-bar se ḳhat
main kyon javab men na likhun ab-e-zar se ḳhat
allah re shauq-e-silsila-e-nama-o-payam
ik ḳhat gaya idhar se ik aaya udhar se ḳhat
kya janun hoga harf-e-tamanna bhi ya nahin
bhiga tha likhte vaqt miri chashm-e-tar se ḳhat
naama amal ka dekh na ai davar-e-nushur
is par tu khinch ḳhama-e-rahmat-asar se ḳhat
har lafz us ka vah.y na kyon ho mire liye
likkha hai us ne ta.er-e-sidra ke par se ḳhat
us par farefta kahin qasid bhi ho na jaa.e
main bhejta nahin isi vahm-o-ḳhatar se ḳhat
‘za.iq’ ali ke naam ko mushkil men aazma
gardan pe tegh ka na paḌe is sipar se ḳhat
Leave a Reply