Shad Azimabadi
gham-e-firaq mai o jaam ka khayal aaya
safed baal liye sar pe ik vabal aaya
milega ghair bhi un ke gale ba-shauq ai dil
halal karne mujhe iid ka hilal aaya
agar hai dida-e-raushan to aftab ko dekh
udhar uruuj hua aur idhar zaval aaya
lutae dete hain in motiyon ko dida-e-shauq
bhar aae ashk ki muflis ke haath maal aaya
lagi nasim-e-bahari jo maarifat gaane
gulon pe kuchh nahin mauquf sab ko haal aaya
payam-bar ko abas de ke khat udhar bheja
gharib aur vahan se shikasta-hal aaya
khuda khuda karo ai ‘shad’ is pe nakhvat kya
jo shairi tumhen aai to kya kamal aaya
Leave a Reply