zindagi hogi miri ai gham-e-dauran ik roz
main sanvarunga tiri zulf-e-pareshan ik roz
gul khilaegi nai mauj-e-baharan ik roz
TuuT hi jaenge qufl-e-dar-e-zindan ik roz
kitne uljhe hue halat-e-zamana hain abhi
honge shane pe mire gesu-e-janan ik roz
ahl-e-zindan se ye kah do ki zara sabr karen
hoga har samt gulistan hi gulistan ik roz
aa ke ik roz jala.unga muradon ke diye
teri mahfil men karunga main charaghan ik roz
jaan deta huun abhi ishq ke andaz pe main
husn hoga mire pahlu men ghazal-ḳhvan ik roz
kuchh andhere hain abhi raah men haail ‘aḳhtar’
apni manzil pe nazar aaega insan ik roz
Leave a Reply