dard ki surat men vo umda sa tohfa de gaya
bevafa duniya men jiine ka sahara de gaya
jism hai azad lekin dil asir-e-ishq hai
kuchh haqiqat de gaya vo kuchh fasana de gaya
saari duniya ek din yuun hi fana ho ja.egi
jalte jalte ek parvana ishara de gaya
apne mustaqbil ko raushan karne nikle the magar
shahr ka suraj to ankhon ko andhera de gaya
ho ga.e kafur saare gham ba-yak-laḳht-o-nazar
jab kabhi vo daad ummid-e-tamanna de gaya
kis qadar viran hai us ke bina saara chaman
sochta rahta huun vo kya le gaya kya de gaya
raqs-farma zehn men hai ab bhi vo surat ‘sahar’
jaate jaate apni yadon ka ḳhazana de gaya
Leave a Reply