zaban pe ḳhud-baḳhud arz-e-mohabbat aa.i jaati hai
khule paḌte hain arman zindagi sharma.i jaati hai
bulave aa rahe hain manzilon ke shaam se lekin
tamannaon ko in ki god men niind aa.i jaati hai
vo aa.e hain tasalli ke liye lekin ye aalam hai
nigahen nam hain lau avaz ki tharra.i jaati hai
dimagh-o-dil ki saari kashmakash bekar-o-la-hasil
nashe ki tarah us ki yaad sab par chha.i jaati hai
nahin kuchh tere baa.is ye udasi bad-guman mat ho
jahan jaata huun mere saath ye tanha.i jaati hai
Leave a Reply