Hisar-E-Ashiqi Mein Wajd Ki Haalat Mein Rahta Hun

Alok Yadav

hisar-e-ashiqi men vajd ki halat men rahta huun

baharen mujh men ḳhema-zan hain main rahat men rahta huun

kabhi masruf tha main aj-kal fursat men rahta huun

akela huun so apni zaat ki vus.at men rahta huun

jo tu ne aag baḳhshi hai usi men jal raha huun main

hai tere qurb ki chahat isi chahat men rahta huun

na kuchh paane ki hasrat hai na kuchh khone ka ḳhatra hai

bahut be-ḳhauf ho kar main tiri sohbat men rahta huun

nikal aaya huun main ‘alok’ duniya ke jhamelon se

na.i bedariyan hain fikr ki jannat men rahta huun