Hisar-E-Ashiqi Mein Wajd Ki Haalat Mein Rahta Hun

hisār-e-āshiqī meñ vajd kī hālat meñ rahtā huuñ

bahāreñ mujh meñ ḳhema-zan haiñ maiñ rāhat meñ rahtā huuñ

kabhī masrūf thā maiñ āj-kal fursat meñ rahtā huuñ

akelā huuñ so apnī zaat kī vus.at meñ rahtā huuñ

jo tū ne aag baḳhshī hai usī meñ jal rahā huuñ maiñ

hai tere qurb kī chāhat isī chāhat meñ rahtā huuñ

na kuchh paane kī hasrat hai na kuchh khone kā ḳhatra hai

bahut be-ḳhauf ho kar maiñ tirī sohbat meñ rahtā huuñ

nikal aayā huuñ maiñ ‘ālok’ duniyā ke jhameloñ se

na.ī bedāriyāñ haiñ fikr kī jannat meñ rahtā huuñ

Leave a Comment