sahra men koi saya-e-divar to dekho
ai ham-safaro dhuup ke us paar to dekho
jalta huun andheron men ki chamke koi chehra
mausam hain adavat ke magar pyaar to dekho
daftar ki thakan oḌh ke tum jis se mile ho
us shaḳhs ke taaza lab-o-ruḳhsar to dekho
kyuun maang rahe ho kisi barish ki dua.en
tum apne shikasta dar-o-divar to dekho
kal shaam vo tanha tha samundar ke kinare
kya soch rahe ho koi aḳhbar to dekho
ankhen hain ki zaḳhmi hain badan hain ki shikasta
ashob-e-safar huun miri raftar to dekho
Leave a Reply