jitna tahzib-e-badan se main sanvarta ja.un
utna hi TuuT ke andar se bikharta ja.un
zindagi jaise calendar pe badalti tariḳh
main shab-o-roz ke manind guzarta ja.un
kya pata ḳhvabon ki ta.abir mile ya na mile
kisi kaghaz pe unhen note hi karta ja.un
sehn-e-gulshan se vo ik aḳhiri rishta bhi gaya
ḳhushk patton ki tarah ab to bikharta ja.un
tah-e-zulmat in a.ankhon ke diye jalte jaa.en
ziina ziina main ujalon men utarta ja.un
gard-e-daman ki tarah mujh ko uḌane vaale
aks ban kar tiri a.ankhon men Thaharta ja.un
kitne ghabra.e hue hain mire qatil ‘mohsin’
astinon pe lahu ban ke ubharta ja.un
Leave a Reply