is baar un se mil ke juda ham jo ho ga.e
un ki saheliyon ke bhi anchal bhigo ga.e
chaurahon ka to husn baḌha shahr ke magar
jo log namvar the vo patthar ke ho ga.e
sab dekh kar guzar ga.e ik pal men aur ham
divar par bane hue manzar men kho ga.e
mujh ko bhi jagne ki aziyyat se de najat
ai raat ab to ghar ke dar-o-bam so ga.e
kis kis se aur jaane mohabbat jatate ham
achchha hua ki baal ye chandi ke ho ga.e
itni lahuluhan to pahle faza na thi
shayad hamari ankhon men ab zaḳhm ho ga.e
iḳhlas ka muzahira karne jo aa.e the
‘az.har’ tamam zehn men kanTe chubho ga.e
Leave a Reply