bhaDe Ka Ek Makan Hun Mujhko KHabar Nahin Hai

Tripurari

bhaḌe ka ik makan huun mujh ko ḳhabar nahin hai

apna hi mehman huun mujh ko ḳhabar nahin hai

koi bata.e mujh ko zinda huun mar chuka huun

gar huun to main kahan huun mujh ko ḳhabar nahin hai

kuchh bhi nahin bacha hai bas duur tak ḳhala hai

kya main hi asman huun mujh ko ḳhabar nahin hai

tum mere darmiyan ho mujh ko pata hai lekin

main kis ke darmiyan huun mujh ko ḳhabar nahin hai

kuchh sau arab sitare mujh men hain dafn ya.ani

main ek kahkashan huun mujh ko ḳhabar nahin hai

apne hi zehn-o-dil par chhaya hua huun kab se

badal huun ya dhuan huun mujh ko ḳhabar nahin hai

koi ḳhayal huun main ya phir saval huun main

main kaun sa saman huun mujh ko ḳhabar nahin hai

kirdar mar chuke hain lekin main ji raha huun

main kaisi dastan huun mujh ko ḳhabar nahin hai