nigar-e-subh ki ummid men pighalte hue
charagh khud ko nahin dekhta hai jalte hue
vo husn us ka bayan kya kare jo dekhta ho
har ik ada ke kai qad nae nikalte hue
vo mauj-e-mai-kada-e-rang hai badan us ka
ki hain talatum-e-mai se subu uchhalte hue
to zarra zarra us aalam ka hai zulekha sifat
chale jo dasht-e-bala men koi sambhalte hue
ye ruuh khinchti chali ja rahi hai kis ki taraf
ye paanv kyuun nahin thakte hamare chalte hue
usi ke naam ki khushbu se saans chalti rahe
usi ka naam zaban par ho dam nikalte hue
khayal o khvab ke kya kya na silsile nikle
charagh jalte hue aftab Dhalte hue
andhere hain yahan suraj ke naam par raushan
ujalon se yahan dekhe hain log jalte hue
utaar in men koi apni raushni ya rab
ki log thak gae zulmat se ab bahalte hue
vo aa rahe hain zamane ki tum bhi dekhoge
khuda ke haath se insan ko badalte hue
vo subh hogi to firaun phir na guzrenge
dilon ko raundte insan ko masalte hue