Zafar Sahbai
shab ke gham din ke azabon se alag rakhta huun
saari tabiron ko ḳhvabon se alag rakhta huun
jo paḌha hai use jiina hi nahin hai mumkin
zindagi ko main kitabon se alag rakhta huun
us ki taqdis pe dhabba nahin lagne deta
daman-e-dil ko hisabon se alag rakhta huun
ye amal ret ko paani nahin banne deta
pyaas ko apni sarabon se alag rakhta huun
us ke dar par nahin likhta main hisab-e-duniya
dil ki masjid ko ḳharabon se alag rakhta huun
Leave a Reply