Arsh Siddiqui
yuun na koi tiri mahfil men pareshan ho jaa.e
jaise avaz-e-saba dasht men hairan ho jaa.e
muntazir hain miri aahaT ki bala.en kitni
ek mushkil to nahin hai ki jo asan ho jaa.e
chak-e-daman hi zamane se nahin hota rafu
aur agar siina kabhi chak-e-gareban ho jaa.e
pech-dar-pech hai yuun silsila-e-zulf-e-hayat
haath lagte hi jo kuchh aur bhi pechan ho jaa.e
dagh-e-dil jalne lage bujh ga.i har sham-e-tarab
yuun hai to yuun hi sahi ghar men charaghan ho jaa.e
mujh pe qadghan hai ki main bazm men ḳhamosh rahun
aur ḳhamoshi hi jo rusva.i ka saman ho jaa.e
nashtar-e-shauq ke hathon gul-e-sad-barg hai dil
ḳhuub ho ab jo ye nazr-e-dam-e-tufan ho jaa.e
kyuun na phir jalne lagen rashk se virana-o-dasth
shahr jab dil ki nigahon men bayaban ho jaa.e
dil ko sauda hai rahe rang-e-shafaq pesh-e-nazar
gham ko ik taur to bahlane ka saman ho jaa.e
raushni shaam ki sun paa.e na avaza-e-shab
mohr-e-zartab ka afaq se paiman ho jaa.e
baat is aankh men poshida hai vo ‘arsh’ ki jo
lab se nikle to mire siine pe paikan ho jaa.e
Leave a Reply