Khurshid Talab
vo jis ne Dhaal diya barf ko sharare men
main kab se soch raha huun usi ke baare men
na jaane niind se kab ghar ke log jagenge
ki ab to dhuup chali aa.i hai osare men
main jaag jaag ke shab bhar use talashta huun
likha hua hai mira naam ik sitare men
khilegi dhuup to vaadi ka rang nikhrega
abhi to os ki ik dhund hai nazare men
kabhi dimagh ko ḳhatir men ham ne laaya nahin
ham ahl-e-dil the hamesha rahe ḳhasare men
‘talab’ ye soch ke lag jaa.e na zaban men zang
kisi se baat main karta nahin ishare men
Leave a Reply