Amjad Islam Amjad
zindagi dard bhi dava bhi thi
ham-safar bhi gurez-pa bhi thi
kuchh to the dost bhi vafa-dushman
kuchh miri aankh men haya bhi thi
din ka apna bhi shor tha lekin
shab ki avaz be-sada bhi thi
ishq ne ham ko ghaib-dan kiya
yahi tohfa yahi saza bhi thi
gard-bad-e-vafa se pahle tak
sar pe ḳhema bhi tha rida bhi thi
maan ki ankhen charagh thiin jis men
mere ham-rah vo dua bhi thi
kuchh to thi rahguzar men sham-etalab
aur kuchh tez vo hava bhi thi
bevafa to vo ḳhair tha ‘amjad’
lekin us men kahin vafa bhi thi
Leave a Reply