Muhasara

mire ghanim ne mujh ko payam bheja hai

ki halqa-zan hain mire gird lashkari us ke

fasil-e-shahr ke har burj har manare par

kaman-ba-dast sitada hain askari us ke

vo barq lahar bujha di gai hai jis ki tapish

vajud-e-khak men atish-fishan jagati thi

bichha diya gaya barud us ke paani men

vo ju-e-ab jo meri gali ko aati thi

sabhi durida-dahan ab badan-darida hue

supurd-e-dar-o-rasan saare sar-kashida hue

tamam suufi o salik sabhi shuyukh o imaam

umid-e-lutf pe aivan-e-kaj-kulah men hain

moazzazin-e-adalat bhi half uthane ko

misal-e-sail-e-mubarram nashista raah men hain

tum ahl-e-harf ki pindar ke sana-gar the

vo asman-e-hunar ke nujum samne hain

bas ik musahib-e-darbar ke ishare par

gada-garan-e-sukhan ke hujum samne hain

qalandaran-e-vafa ki asaas to dekho

tumhare saath hai kaun as-pas to dekho

so shart ye hai jo jaan ki amaan chahte ho

to apne lauh-o-qalam qatl-gah men rakh do

vagarna ab ke nishana kaman-daron ka

bas ek tum ho so ghairat ko raah men rakh do

ye shart-nama jo dekha to elchi se kaha

use khabar nahin tarikh kya sikhati hai

ki raat jab kisi khurshid ko shahid kare

to subh ik naya suraj tarash laati hai

so ye javab hai mera mire adu ke liye

ki mujh ko hirs-e-karam hai na khauf-e-khamyaza

use hai satvat-e-shamshir par ghamanD bahut

use shikoh-e-qalam ka nahin hai andaza

mira qalam nahin kirdar us muhafiz ka

jo apne shahr ko mahsur kar ke naaz kare

mira qalam nahin kaasa kisi subuk-sar ka

jo ghasibon ko qasidon se sarfaraz kare

mira qalam nahin auzar us naqab-zan ka

jo apne ghar ki hi chhat men shigaf Dalta hai

mira qalam nahin us duzd-e-nim-shab ka rafiq

jo be-charagh gharon par kamand uchhalta hai

mira qalam nahin tasbih us maballigh ki

jo bandagi ka bhi har dam hisab rakhta hai

mira qalam nahin mizan aise aadil ki

jo apne chehre pe dohra naqab rakhta hai

mira qalam to amanat hai mere logon ki

mira qalam to adalat mire zamir ki hai

isi liye to jo likkha tapak-e-jan se likha

jabhi to loch kaman ka zaban tiir ki hai

main kat girun ki salamat rahun yaqin hai mujhe

ki ye hisar-e-sitam koi to giraega

tamam umr ki iza-nasibiyon ki qasam

mire qalam ka safar raegan na jaega

sarisht-e-ishq ne uftadgi nahin paai

tu qadd-e-sarv na biini o saya-paimai

Leave a Comment